Hmuifang Tlang

Aizawl atang thlang lam 50Km ah a awm a, Hmuifang tlang 1619 meters a sang hi ramhnuai thing leh mau in ala khat a, Mizo Lalte hunlai atanga humhalh a ni. Hmuifang Tourist Resort hi a tlang sang laiah awmin Mizoram Sawrkar in a enkawl a ni.

He Resort hi Mizo Lal rama sak a ni a. Nungchate awm nana humhalh tlat a ni. Resort ah hian awm hahdamna tur double room paruk(6) leh cafetaria te a awm a. Tlang zawl phul hring dup te chu picnic leh intihhlim nan te a nuam hle a. Hemi hmunah hian Anthurium Festival leh Thalfavang Kut te neih thin a ni a. Hemi hmun atang hian a chhehvel thingtlang khua – Hmuifang, Sumsuih, Lamchhip leh Chamring te a kal theih a, heng khua ah te hian hmanlai Mizo nun dan chhawm zel ala ni.

He tlang hian khaw thlirna hmun nuam deuh nei in, a bul vel khua te a hmuh theih vek a ni. A chhehvel hi ramhnuia vek la ni in, thing leh mau, thlai leh pangpar, sava leh ramsa te anla tam em em a ni.